Астанада «Esirtkisiz QAZAQSTAN» атты республикалық конференция өтті. Іс-шараны ҚР Мәдениет және ақпарат министрлігі мен ҚР Ішкі істер министрлігінің Есірткі құқық бұзушылықтарының профилактикасы бойынша кеңесінің қолдауымен «Esbol Qory» қоғамдық қоры ұйымдастырды
Бұл бастама Мемлекет басшысы Қасым-Жомарт Тоқаевтың Қауіпсіздік кеңесінің отырысында берген тапсырмалары аясында ұйымдастырылды. Президент ол жерде наркотизм ел болашағына төнген қатер екенін ерекше атап өтті, деп хабарлайды ҚР Мәдениет және ақпарат министрлігінің баспасөз қызметі.
Конференция жұмысына нашақорлықтың алдын алу мен жастарды қолдауға жауапты негізгі мемлекеттік органдардың бірінші басшылары, Мәдениет және ақпарат министрлігі, Ішкі істер министрлігі, Денсаулық сақтау министрлігі, сондай-ақ халықаралық серіктестердің (БҰҰ құрылымдары) өкілдері қатысты.
Жас көшбасшылар нашақорлықтың алдын алу бойынша өздері әзірлеген инновациялық тәсілдер мен цифрлық шешімдерді ұсынды.
Солардың бірі – «MERGEN» ақпараттық жүйесі. Ол онлайн кеңістікті есірткіге қатысты вирустық контентті анықтап, оны бұғаттайды. Осы жүйенің арқасында Қазақстан аумағында 5000-нан астам интернет-ресурс анықталды. Сонымен қатар есірткі қылмысының цифрлық картасы таныстырылды. Картаны құқық қорғау органдары өз қызметіне белсенді қолдануда.
Конференция барысында нашақорлықтың алдын алу жөніндегі 20 өңірлік фронт-кеңсе жұмысы талқыланды. Бұл орталықтар жастарға бағытталған және жасөспірім, студенттерге салауатты өмірдің маңызын түсінікті тілде жеткізеді. Сол үшін арнайы ғылыми әдістемелерге негізделген заманауи бағдарламаларды да енгізуде.
Сонымен қатар конференция аясында бүкіл ел бойынша жас белсенділерді біріктіретін «Esirtkisiz QAZAQSTAN» жалпыұлттық жастардың есірткіге қарсы қозғалысын құру туралы меморандумға қол қойылды.
