2025 жылғы Ұлттық рейтинг нәтижесінде өнер және спорт саласы бойынша білім беретін жоғары оқу орындары арасында Қазақ ұлттық хореография академиясы үздік деп танылды
Рейтингті Білім беру сапасын қамтамасыздандыру бойынша тәуелсіз агенттігі (IQAA) әзірлеген, деп хабарлайды ҚР Мәдениет және ақпарат министрлігінің баспасөз қызметі.
«Бұл – елдегі жоғары білім беру саласындағы беделді көрсеткіштердің бірі. Рейтинг жоғары оқу орындарының академиялық беделі, білім беру сапасы, ғылыми-зерттеу қызметі және түлектердің еңбек нарығындағы сұранысы сияқты негізгі критерийлер бойынша жасалады», – делінген хабарламада.
Аталмыш көрсеткіш – Академия ұжымы мен білім алушыларының қажырлы еңбегі мен кәсіби шеберлігінің нәтижесі. Соңғы жылдары Академия ұлттық және халықаралық деңгейде бірқатар шығармашылық және ғылыми жобаларды табысты жүзеге асырып, заманауи білім беру бағдарламаларын енгізу арқылы тұрақты түрде көшбасшы мәртебесіне ие.
Академия білім алушылары беделді халықаралық байқауларда жоғары нәтиже көрсетіп, жүлделі орындарды еншілеп жүр. Оқу орнында тек Қазақстаннан ғана емес, әлемнің түкпір-түкпірінен келген балалар білім алып, кәсіби тұрғыда шыңдалуда. Шәкірттер үшін жан-жақты дамуға жағдай жасалып, хореография және өнер саласындағы әлемдік деңгейдегі мамандармен тұрақты түрде шеберлік сабақтары ұйымдастырылады, сондай-ақ шетелдің үздік университеттерінде академиялық ұтқырлық бағдарламасы арқылы білімдерін жетілдіру мүмкіндігі бар.
Мемлекет басшысы Қасым-Жомарт Тоқаевтың бастамасымен креативті арт-индустрия саласы елімізде қарқынды дамып келеді. Осы орайда Қазақ ұлттық хореография академиясы 2025–2026 оқу жылына жаңадан ашылған «Креативті арт-индустрия» білім беру бағдарламасы бойынша құжат қабылдауды бастады. Аталған бағдарлама аясында еліміздің осы саладағы жетекші мамандары білім алушыларға дәріс береді.
Академияның басты мақсаты — хореография, өнертану, арт-менеджмент және креативті арт-индустрия бағыттары бойынша білікті кадрлар даярлап, отандық мәдениет пен өнер саласына жаңа серпін беретін кәсіби мамандардың жаңа буынын қалыптастыру. Бүгінде Академия – тек Қазақстанда ғана емес, бүкіл Орталық Азияда хореография өнері саласындағы жетекші жоғары оқу орны.
