Конференцияның ашылуында Қазақстан Республикасы Президенті Әкімшілігі басшысының бірінші орынбасары Дәурен Абаев Мемлекет басшысы Қасым-Жомарт Тоқаевтың құттықтауын оқыды және өзінің кіріспе пікірін білдірді. Сондай-ақ, Қазақстан Республикасының Білім және ғылым министрі Асхат Аймағамбетов құттықтау сөзін сөйледі.
Халықаралық конференция жұмысына ҚР Парламенті мен Мәжілісінің депутаттары, еліміздің және шетелдік (Түркия, Қырғызстан, Ресей т.б.) алаштанушы-ғалымдар, әлихантанушылар қатысуда.
Алаш көшбасшысы Әлихан Бөкейханның 155 жылдығына арналған ғылыми жиынға Ел Президенті Қасым-Жомарт Кемелұлының жолдаған құттықтауы:
“Құрметті конференцияға қатысушылар!
Аса көрнекті мемлекет және қоғам қайраткері Әлихан Бөкейханның 155 жылдығына арналған алқалы жиынның ашылуымен құттықтаймын!
Әлихан Бөкейхан – төл тарихымызда өшпес із қалдырған біртуар тұлға. Ол ХХ ғасырдың басында «Алаш» ұлт-азаттық қозғалысының көшін бастап, дербес ел болудың алғышарттары мен негіздерін айқындады. Халқының бостандығы үшін бүкіл ғұмырын сарп етті.
Ғылымның әртүрлі саласына терең бойлаған саңлақ саясаткер қазақтың ой-өрісін кеңейтіп, руханиятымызды дамытуға зор үлес қосты. Ұлттық интеллигенцияның жаңа буынын қалыптастыруға ұйытқы болды. Халқына адал қызмет етіп, мол мұра қалдырды.
Тарихи тұлғаның мерейтойы Қазақстан Тәуелсіздігінің 30 жылдығымен тұспа-тұс келіп отыр. Мұның символдық мәні бар. Шын мәнінде, бүгінгі егемендігіміз – Әлихан бастаған ұлт зиялыларының орындалған арманы.
Әлихан Бөкейханның тағылымды өмір жолы әрдайым дәріптеліп, жастар үшін үлгі-өнеге болуға тиіс.
Өскелең ұрпақ Алаш арыстары ұстанған мемлекеттілік пен мемлекетшілдік идеясына қашанда берік болып, азаттық рухын асқақтата береді деп сенемін.
Конференция жұмысына табыс тілеймін!”
alash24.kz
