Елордадағы Астана-1 теміржол вокзалынан қаланың Белсенді ұзақ өмір сүру орталығының 47 зейнеткері Семей қаласы, Жидебай ауылына бағытталған «Абайтану» экскурсиялық турына жолға шықты, деп хабарлады қала әкімдігінің ресми сайты
Астана-1 теміржол вокзалына жиналған зейнеткерлерге Белсенді ұзақ өмір сүру орталығының қатысушысы Орманбек Оразұлы сәтті сапар болсын деген ниетпен бата бергеннен кейін саяхатшылар пойызға жайғасып, қасиетті Абай еліне ат басын бұрды.
Ұйымдастырушылардың айтуынша, экскурсия 28-31 тамыз аралығын қамтитын болады.
«Бүгін Астана қаласы Белсенді ұзақ өмір сүру орталығының 45 зейнеткері Абай еліне жолға шықты. Экскурсия 28-31 тамыз аралығын қамтиды. Олар жоспар бойынша 29 тамыз күні Абай ауданы Жидебай ауылында Күшікбай батырға арналған ескерткіш пен «Еңлік-Кебек» ескерткішіне, М.Әуезов музейіне (Бөрілі қорығы), Сырт-Қасқабұлақ аңғарына, «Абай жолы» паркіне – А. Құнанбайұлының туған жеріне, сондай-ақ ақынның үй-мұражайына, Абай-Шәкәрім кесенелер кешеніне және Қ.Оразалин музейіне (Қарауыл ауылы) барып тамашалайтын болады. 30 тамыз күні Семей қаласында Абай Құнанбайұлының әдеби-мемориалдық кешеніне, «Өлімнен күштірек» монументіне және бірқатар музейге экскурсия ұйымдастырылады», – дейді Белсенді ұзақ өмір сүру орталығының перспективалық даму және әлеуметтік жобалар бөлімінің басшысы Қымбат Тасымова.
Оның айтуынша, бұған дейін зейнеткерлердің алғашқы тобы аталған экскурсияға сәтті барып қайтқан. Турға жалпы саны 91 зейнеткер қатысатын болады.
Айта кетейік, орталық бұған дейін «Жетісу» саябағында зейнеткерлерге арналған би кештерін ұйымдастырып, жазғы маусымда таза ауада айкүне, йога, тыныс алу гимнастикасы, скандинавиялық жүру сияқты әлеуметтік жобаларды жүзеге асырған болатын.
