Асылбек Сейітов – жас доктор, қыз мінезді, ақ қағаздан ақ, ұлтшыл жас. Областной қазақ комитетінде председатель орынбасары…
1917 жылы Орынбор қаласында өткен бірінші жалпықазақ құрылтайына сайланған депутаттарға баға берілгенде “Қазақ” газеті Асылбек Сейітұлы туралы осылай жазған екен. Ол қатардағы қатысушы болып қалмай, құрылтай президиумының төрағасы Халел Досмағанбетұлы, қосалқы төрағалар – Ахмет Байтұрсынұлы мен Әл-Мұхаммед Көтібарұлының қатарында Міржақып Дулатұлымен бірге хатшылық қызметіне сайланған.
Бүгін (22 қаңтар), осындай аяулы тұлға, Алаш қайраткері, ғалым, алғашқы қазақ дәрігерлерінің бірі, денсаулық саласының аса көрнекті өкілі – Асылбек Сейітұлының туғанына 130 жыл толып отыр.
Асылбек Сейітұлы – Алаш Орданың Ақмола облыстық комитеті басшыларының бірі болған, ұлт-азаттық қозғалысына үлкен үлес қосқан, Қазақстан дәрігерлерінің сиезіне, Қазақ АКСР-і кеңестеріне делегат болып қатысқан белгілі адам болған. Ол Баянауылда, Семей қаласында көп жылдар бойы денсаулық сақтау саласында қызмет атқарған. Бас дәрігер, басқарма бастығы лауазымдарында болған. Бір сөзбен айтқанда еліміздегі медицина саласына өлшеусіз үлес қосқан.Асылбек Сейітұлы кеңес өкіметіне қарсы сөз айтты, “қазақ жерінде аштықты қолдан ұйымдастырды” деп, жала жапты деген желеумен қылмысы небәрі үш-ақ рет тексеріліп, 1937 жылы 4 желтоқсанда ату жазасына кесілген және үкім сол күні-ақ орындалған. Оның туған бауырлары – Мұсылманбек пен Мұратбек те “Алаш” партиясының мүшелері ретінде репрессияға ұшыраған.
Асылбек пен Мұсылманбек Сейітовтер Алаш Орданың жанындағы жастар бірлестігі – “Бірлік” ұйымның жетекшілігіне сайланған, ал кіші інісі Мұратбек Сейітов Семейде құрылған “Жас азамат” ұйымы жетекшілерінің бірі болған.
Елге кеңінен танылмаған, аты көпке мәлім емес, алайда, Әлихан, Ахмет, Міржақыптардың ізін жалғап, Алаш идеясын ұстанған ұлт қайраткері, азаттық күрескері, медицина майталманы – Асылбек Сейітұлының туған күні, мерейлі жылы құтты болсын!
